kayan9896上節目打電話問舊公司同事有冇嬲佢離巢 試當真出PO否認：無收過電話

26歲嘅kayan9896（吳家忻）喺噚日（22日）凌晨於IG宣布與「百億富三代」馬桂烽（Justin）分手消息，引起網民熱烈討論。除此之外，近日佢獲邀請擔任由樂隊Zpecial主持嘅YouTube節目《醉酒Don’t Call》做嘉賓，期間除咗被問到有啲咩想同舊公司「試當真」講，佢玩遊戲輸咗仲打電話俾舊公司嘅同事問有冇嬲佢離開。節目出街後，「試當真」隨即喺Threads出PO否認有台前幕後接收過電話，令事件出現羅生門局面。

kayan9896因參與頻道「試當真」演出而爆紅，除咗成為時尚品牌新寵兒之外，更以歌手身份進軍樂壇，但佢喺早前承認已離開「試當真」。近日佢喺YouTube節目《醉酒Don’t Call》擔任嘉賓，期間被問到有啲咩想同舊公司講，佢就話：「我好多謝舊公司對我嘅栽培，對我嘅照顧，冇你冇我」，之後被Zpecial成員指佢雖然真心但官腔，kayan9896就再補充話：「雖然我哋可能有啲拗撬，但我覺得冇嘢係溝通解決唔到，我都好唔開心」。最終kayan9896玩遊戲輸咗，打電話俾舊公司嘅一位同事，並問有冇嬲佢離開，然後呢位同事就話冇，因為kayan9896係佢朋友，所以覺得kayan9896好就可以啦！

由於聲音被變聲，所以唔知道kayan9896打電話俾邊一個，所以節目出街後網民紛紛猜測係邊一個，例如「豪哥FOR SURE啦」、「啲口吻明顯係豪哥哥」、「似豪哥or許賢」、「佢啲笑聲位同點，好明顯係豪哥」「我覺得似locker」及「語氣好locker喎」等等，同時亦有網民不滿kayan9896消費「試當真」：「Hong Kong Taylor Swift識到條有錢仔搞到冇哂班朋友，依家散咗就搵返舊公司r流量面皮厚到 好心華納咪成日幫d麻煩人宣傳洗白啦」及「隔咗咁耐仲消費舊公司 其實都幾差」等等。

而kayan9896舊公司「試當真」亦有喺Threads出PO否認有台前幕後接收過電話：「謝謝大家的關心和查問，我們公司台前幕後並無收過節目電話」，令事件鬧出「羅生門」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！