傅嘉莉「樓換樓」愈住愈富貴被封圈中小富婆 愛收藏名牌手袋 曾被指釣金龜
傅嘉莉（Kelly）入行21年，參與過多套劇集拍攝，去年憑劇集《香港人在北京》「芬妮」（Funny）一角打入「最佳女配角」最後5強，不過大熱倒灶，唔少觀眾都戥佢唔抵。終於，傅嘉莉於日前舉辦嘅《萬千星輝頒獎典禮2024》憑《反黑英雄》奪得「最佳女配角」獎項，實現零的突破，並洗甩花瓶形象。
傅嘉莉早前完成鑽石鑑定師文憑課程，而上個月被網民野生捕獲乘坐港鐵，被激讚上進又貼地。而原來傅嘉莉係一名小富婆，多年來投資有道。傅嘉莉曾透露自己21歲已賺到首個100萬，22歲成功置業，之後開始「樓換樓」，2006年以300多萬購入海怡半島單位，再於2008年以近600萬放出，同年以218萬購入西翠安閣一個單位，同樣於兩年後賣出，成交價為326萬。有指，傅嘉莉早年以公司名義用5,000萬購入淺水灣道11號蔚峯園一個單位自住，與容祖兒、張智霖、鄭裕玲等藝人係鄰居，2023年以1,900萬購入跑馬地THE ASTER豪宅，實行愈住愈富貴。
傅嘉莉愛儲潮流玩具及名牌手袋，曾經於清談節目《姊妹淘》與莊思敏、張寶兒大晒Hermès私伙手袋，手袋嘅款式都屬特別款，其中兩款炒價加埋約46萬。傅嘉莉曾屢次被指釣金龜，又曾被影到與「四眼肥叔叔」逛街，有名車接送，其後傅嘉莉表示「四眼肥叔叔」係新加坡嘅朋友，自己只係盡地主之誼，又指自己有唔同年齡層、身份、婚姻狀態、身型和國藉嘅朋友。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！
