吳家樂爆炎明熹「假解凍」現身活動原因 大會稱Gigi趕時間未安排訪問：有幾忙呢？

炎明熹（Gigi）疑因有意唔續約TVB而遭雪藏近半年，工作量大減，就連每年台慶盛事都無份出席，直至早前推出新歌《最動人一次》，又為主演嘅音樂特輯《戀上西沙》出席宣傳活動，不過大會當日就以炎明熹趕時間為理由，未有安排佢接受訪問。

炎明熹疑似「解凍」出席活動，獲數百「Gi炎粉」撐場，場面相當墟冚。不過，吳家樂與江美儀於前日（16日）網台節目《娛樂好好玩》提及炎明熹出席活動一事，吳家樂指相信係因為之前拍好咗個地產商廣告，與雪藏與否無關：「點解咁講呢？因為呢單嘢係拍落咗，同埋因為佢係一個地產商廣告，已經畀咗錢、簽咗、拍咗，簡單講句一定要出。你話雪唔雪藏呢，佢根本連訪問冇時間就走⋯⋯」當日，炎明熹只有喺活動尾聲走落台與「Gi炎粉」合照，並表示好開心出席活動，感覺好溫暖，又指一定會再出席公開場合；惟大會以炎明熹趕時間為理由拒絕接受訪問。吳家樂表示，曾翻看當日片段，見到炎明熹唱完歌後已有記者問問題，但當時其咪高峰已被關掉，工作人員又將炎明熹帶離會場。吳家樂直言：「佢被雪藏緊或者停工階段，有幾忙呢？可能趕住上堂囉」，但謝遜表示有網民發現活動結束後不久，炎明熹於社交平台PO出玩貓照。

吳家樂又用早前林明禎缺席主演電影《手機見鬼》首映一事作例子，指搵品牌贊助或借商場搞宣傳活動嘅條件必定係主角出現，否則對方有權唔借場及唔贊助，林明禎當晚失場已經無咗個贊助，認為炎明熹呢次情況與林明禎雷同，唔出現就會好大鑊：「拍咗唔出街，咪大鑊囉，究竟邊個負責呢？唔關佢事，佢拍咗啦嘛，你已經知道個責任去咗邊度啦，既然大家都唔需要負呢個責任，將條片出咗街咪得囉，將隻歌上咗架咪得囉，佢拍嘅環境、地方都同個地產商有關㗎嘛。」炎明熹喺過往半年期間，積極經營社交平台，被主持們激讚炎明熹為人，於雪藏期間從無講過不滿TVB嘅說話，覺得佢好叻女，又指炎明熹今年先19歲第時大把機會。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！