吳家樂早聽聞王賢誌爭街數 爆王父冇再幫手還 重提「示愛事件」直指有人做宣傳

圈中知名富二代王賢誌傳出因為財務困難而要申請破產，更有指涉及金額達到300萬。Vinci之後喺facebook出post寫道「關於這個艱難的決定，是我本人經過深思熟慮及徵詢多方意見之後慎重作出」，又形容「如果人生的不同階段就有如天氣一樣，肯定我將要迎接一段嚴寒的日子，不過對於未來，我必定不會放棄，繼續積極及堅強面對」。但由於已進入司法程序，王賢誌未有再作交代。

同王賢誌一齊喺TVB做過主持嘅吳家樂，早前主持網上節目《娛樂好好玩》時討論王賢誌破產一事時，直言「呢單新聞出得叫遲」，因為家樂早有聽聞。吳家樂話佢同王賢誌過去做過TVB《K-100》節目，大家都有參與節目whatsapp群組。「喺疫情之後都有啲聚會，聽到少少佢喺出便都有啲『街數』。我覺得唔奇，因為佢始終係靠自己」。吳家樂又補充，佢聽聞王賢誌爸爸已經好幾年唔再幫Vinci找數，所以估計王賢誌搞同志真人show《仔仔一堂》可能幾吃力。更驚人係，吳家樂相信王賢誌涉及嘅債務，唔止三四百萬。

有觀眾重提王賢誌話鍾意過吳家樂一事。根據資料，2年前王賢誌接受訪問時，承認曾經喜歡過圈中男藝人拍檔，當中提及嘅名字包括陳鍵鋒同吳家樂，更明言家樂應該知Vinci對佢有意思，「我諗唔會唔知啦吓嘛，sense到嘅！」。

吳家樂喺《娛樂好好玩》講返呢件事，再三重申同王賢誌係同事。佢話當時王賢誌為《仔仔一堂》宣傳，有日家樂突然收到Vinci大量短訊話有嘢搵佢。吳家樂心諗「無事不登三寶殿」，一定有陰謀，覺得唔係好嘢，所以冇覆對方。結果第二日就有「王賢誌話鍾意過吳家樂」嘅新聞出街，傳媒朋友都搵吳家樂，同佢講「咁好笑，拉埋你落水」。家樂引述傳媒朋友所講，話「擺明係有人想宣傳自己嘅節目」。吳家樂直認有為呢件事而嬲，因為王賢誌做完個訪問先同佢講，而且家樂認為即使要做宣傳，事先夾定冇所謂。雖然被「擺上枱」，但吳家樂依然覺得王賢誌做主持有優勢，因為夠壓台感。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！