王星剃頭照曝光 網傳坐私人飛機返泰國 雙腳明顯有傷痕

【更新】

內地演員王星喺泰國失蹤事件再有進展，有小紅書用戶指王星已經獲救，並乘搭相信係私人飛機返回泰國曼谷。有片段拍下王星由相信係警務人員陪同坐上警車，現場有唔少傳媒追訪，另外亦有喺機上嘅情況，王星睇落精神唔錯，能夠與人用英語交談，畫面外相信係警務人員同王星表示，有關方面派出唔少人力進行搜尋。而王星嘅身上造型與較早前網上流傳嘅照片吻合。

王星事件驚動中泰政府，泰國總理貝東丹向記者確認已經搵返王星，正安排佢由泰國西北部地區湄索返回曼谷，並會好好處理事件，以免影響當地旅遊業。

根據「7HD頻道」泰國傳媒平台報道，移民局證實中國演員王星在緬甸，預計今天帶回泰國。

而社交媒體小紅書曝光多張王星疑似被剃頭後嘅照片， 相中王星精神狀態略疲累，腳上有疤痕，並無大礙。

______________________________________________________________________

內地演員王星到泰國拍戲，但之後隨即失去聯絡，事件成為內地網路熱話，舒淇、秦嵐等一線女星都幫忙轉發尋人訊息。有報導指，王星到達曼谷後被當地接頭人帶上車，但根據定位王星疑似被帶到泰國與緬甸邊境，更失去聯絡2日有多。

王星下落似乎有新進展，有泰國媒體報導指有關方面已經搵到王星，王目前正在緬甸，人身安全，並於今天返回泰國。但至今王星家人以至中國相關政府部門仲未有正式回應。而內地央視網報導亦引述泰國警方消息指搵返王星消息屬實，但中國駐清邁領事館就未有確認。內地官媒《環球時報》報導就指，泰國出入境部門目前未有任何王星出境紀錄。

曾演出電影《葉問3》、劇集《玫瑰的故事》等嘅王星，自稱佢女友嘅嘉嘉近日發文指，王星聖誕期間收到去泰國工作訊息，後來一度因有懷疑而推卻，但被對方以「換唔到人」為由要求去泰國「開工」。王星抵埗後下落不明，另一演員就指自己爭啲都被送到園區，但因為有懷疑而冇上到「專車」，後來成功甩身並安全回國，但就估計王星已被帶到園區，更稱王已被剃頭。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！