王浩信內地劇視帝降呢做配角 精湛演技獲網民激讚：演得真好
現年41歲嘅王浩信做歌手出身，加入TVB已17年，曾兩度勇奪視帝獎項，攀上事業高峰。佢喺前年離巢TVB，積極於內地發展搵真銀。而最近佢有份演出嘅內地劇《黃雀》熱播，雖然佢由主角降呢做配角，不過佢今次飾演醫生又騷肌肉，獲大批內地網民大讚演技精湛。
由郭京飛及秦嵐等人主演嘅《黃雀》喺日前（18日）正式播出，由於劇集劇情緊湊及演員演技出色，令劇集開播後成為網民熱門討論話題。視帝王浩信喺劇集飾演配角「鹹濕」眼科醫生姜吉峰，為人性格輕佻又好色，喺日前播出嘅一集中，講到佢喺火車遇見靚女，之後佢約對方到酒店「爆房」，跟住佢飲咗對方下藥嘅紅酒後迷暈，事後連裝有眼角膜嘅箱都被盜。
王浩信喺劇中一登場，旋即成為內地網民熱門討論對象，紛紛留言大讚佢演技出色，例如「看了，哈哈一如既往的穩和帥氣」、「很欠打的樣子 演的倒是很到位哈哈哈」、「你演老色批演的還挺好的，很像本色出演，應该不是第一次了吧哥」、「演的好棒」、「王生無可挑剔的演技(*^ｰ^)」、「色色的姜醫生」、「演得真好」及「王浩信本色演出」等等。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！
