鄭東漢談兒子鄭中基離婚傳聞「影響到小朋友」 避答余思敏有冇搬走

因情緒問題及同經理人終止合作而停工多時嘅鄭中基，早前再次現身自家youtube平台，但被網民發現佢同太太余思敏（Sammie）互相取消關注對方IG，有傳二人13年婚姻生變！早前生日嘅Sammie喺IG發限動寫道「Start a new chapter」，更令離婚消息似層層。

有傳媒早前訪問鄭中基爸爸、前唱片公司高層鄭東漢(Norman)，Norman指兒子近排OK，但仲未全面復工，會繼續休息。對於鄭中基同余思敏嘅離婚傳聞，鄭東漢聞言「吓」一聲，之後就話離婚與否係Ronald同Sammie嘅事，唔到佢話事，自己有關心個仔，鄭東漢同時話就算離婚都唔好影響其他人，尤其係小朋友，更加唔好拖佢落水。

對於有傳係余思敏提出離婚，鄭東漢話唔知情，而2位小朋友嘅照顧上同以前一樣。坐擁大屋嘅鄭東漢同個仔及新抱同住一屋，有記者問余思敏仲係咪同Ronald住，鄭東漢有所避忌咁叫傳媒問返Ronald。咁有冇做和事老？Norman話「當然有，盡力啦」。

去年8月鄭中基（Ronald）突然喺facebook發文，指其經理人何慶湘「工作及道德操守有問題」，因此宣布與對方即時終止合作。由於發文前鄭中基太太余思敏曾出post發相暗示有事發生，有網民指Sammie post嘅照片疑似係某酒店地謊，令鄭中基同何慶湘嘅關係更見耐人尋味。後來鄭中基再發長文指自己有情緒病，並且承認有酗酒習慣，停工之外更會由太太陪同去美國參與戒酒療程。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！