35歲張明偉離巢TVB後形象180度大改變 宅男變時尚肌肉型男獲網民激讚

現年35歲嘅張明偉（Aaryn），曾喺TVB處境劇《愛·回家之開心速遞》飾演補習天王George「佐治」一角成功入屋，不過佢喺2021年離巢無綫。回復自由身後，佢繼續喺歌影視界發展，並以樂隊Charming Way發展為主。近年張明偉形象180度大變，由宅男搖身一變成時尚肌肉型男。

早前張明偉喺社交網站上載4年前與現在嘅對比度，兩者明顯好大分別，現時嘅佢練成一身肌肉，變成時尚肌肉型男，難怪網民紛紛留言大讚，例如「大癲！同一個人嚟嘅咩🤯幾時可以再唱歌比Charmyyyy聽」、「男仔都覺得你好型！」、「你而家呢個造型我覺得好襯你呀」「進化中....成功 🔥🔥👏👏」及「好彩你走咗 唔係幾百集都係做同一樣嘢浪費光陰」等等。

《愛‧回家》嘅George係資優生，而現實中張明偉嘅學業成績同樣相當唔錯。佢喺中學時就讀長沙灣天主教英文中學，喺香港考完會考後，佢本來夠分升上中六，但係喺美國讀書嘅姐姐認為美國制度更適合佢，所以佢選擇到美國升學。去到美國先修讀美國社區大學，打好基礎再考入全美入學錄取競爭最激烈嘅公立大學之一嘅加州大學洛杉磯分校（UCLA）傳理系。

張明偉畢業後便加入無綫做《今日VIP》和《港生活．港享受 》PA（助理編導），後來節目監製瑪莉引薦佢入讀2011年25期訓練班，之後佢就開始轉戰幕前。星運平平嘅佢一開始都係做啲毫不起眼嘅閒角，不過佢都冇放棄，選擇繼續堅持追夢。直至George呢個角色嘅出現，令佢開始為人熟悉。除咗演戲之外，張明偉非常熱愛音樂，佢喺2013年參加《星夢傳奇》，雖然未能殺入五強，不過亦令觀眾印象深刻。現時係樂隊Charming Way嘅主音及結他手，佢仲經常上載創作及翻唱歌曲到影片頻道同大家分享。離開TVB後，佢仍然有參與影視工作，例如電影《超神經械劫案下》、《夜校》及HOY TV原創劇《 我愛九龍城》等等。

至於感情方面，上年張明偉與李麗珍女兒許倚榕（Annise）被爆出戀情，其後男方公開認愛，目前可謂事業愛情兩得意!

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！