金球獎2025︳狄美摩亞榮膺影后 《幕府將軍》真田廣之成首位亞裔視帝︳電影LOL
第82屆金球獎美國時間周日晚舉行，今年提名名單公布後，老實講反應好淡靜，但估唔到賽果有唔少驚喜。
以同名小說改編嘅《幕府將軍》，成為劇集組別大贏家，除咗獲得最佳劇集，男主角真田廣之奪得劇集類別（劇情組）最佳男主角，成為首位亞裔視帝。同劇嘅淺野忠信同埋澤井杏奈亦分別獲得最佳男女配角獎，可以話係繼楊紫瓊憑《奇異女俠玩救宇宙》後，亞裔演員再次揚威頒獎台。而去年成為話題作嘅《馴鹿寶貝》(Baby Reindeer)就奪得短篇劇最佳劇集，演跟蹤狂女律師嘅澤Jessica Gunning亦獲得短篇劇最佳女配角。
電影方面，90年代憑《人鬼情未了》走紅嘅狄美摩亞Demi Moore，終於憑《完美物質》獲得電影喜劇類最佳女主角，一嘗影后滋味。狄美摩亞嘅對手唔弱，有《阿諾拉》嘅Mikey Madison、《毒王女人夢》嘅Karla Sofía Gascón等，阿姐終於威返次。而《毒王女人夢》就成為電影組別小贏家，因為今年獎項分配好平均，《毒》都只係拎到4個獎，包括喜劇音樂劇最佳電影。而相信會係另一套喺奧斯卡爭獎大熱嘅《粗獷派建築師》得到最佳劇情片、劇情片最佳男主角（Adrian Brody）等3個獎。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
