蔣祖曼繼子18歲生日發文訴衷情「你真係好難湊，湊死我」 廿幾歲為男友湊仔被封最強繼母

Joman 多年前同電影界幕後陳卓麒拍拖，當時男友帶住同亡妻所生、仍係幼童嘅囝囝陳滌(Day)，但當時廿幾歲嘅Joman視Day為己出，願意照顧繼子。唔經唔覺，早幾日Day 18歲生日，身為媽咪嘅蔣祖曼喺IG發文送祝福。

蔣祖曼除咗祝繼子18歲生日快樂之外，亦寄語Day迎接日後挑戰，「陪你打咗咁耐怪獸，之後就靠你自己繼續闖關啦」。字裡行間也透露二人友好關係。「祝以後繼續陪我打機煲劇買公仔俾我玩唔好嫌我低能煩無聊，無論將來你成為一位點嘅成年人，你喺我心目中都係最好。加油」。蔣祖曼明言阿Day生日對佢嚟講好感觸，最後亦感嘆「PS: 你真係好難湊，湊死我」。

陳滌2歲多時媽媽不幸病逝，陳卓麒獨力湊仔，後來同蔣祖曼交往。Joman同陳卓麒2014年1月3日結婚，大日子正正係Day嘅生日。蔣祖曼婚後誕下一女，Day對妹妹亦相當好。蔣祖曼加入TVB前主要演出獨立電影同舞台劇，收入不太穩定，有時要做餐廳送外賣、樓面等工作幫補生計，而唔駛開工時就會打理Day嘅生活所需。Joman post咗自己同Day嘅生活片段，二人相當親密，不過Joman認為佢地嘅關係似朋友多啲。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！