黃百鳴翻唱《破‧地獄》主題曲《普渡眾生》 獲原唱林家謙分享：超越原唱

黃百鳴早前翻唱MC張天賦歌曲《記憶棉》成為網絡熱話，被網民指勁洗腦；及後，黃百鳴與MC出席電影《誤判》北京首映禮更首度同台合唱，黃百鳴大讚MC唱得非常有感情，自己則唱到好似喺到「斬叉燒」咁。日前，黃百鳴於個人YouTube頻道「百鳴歌」分享電影《破‧地獄》觀後感，又指非常欣賞林家謙包辦曲詞編監嘅主題曲《普渡眾生》，表示電影《破．地獄》成就歌曲《普渡眾生》，歌曲唱紅電影，兩者相輔相成，激讚歌詞配合電影主題，同時再開金口翻唱《普渡眾生》。

黃百鳴表示花咗一段時間學習《普渡眾生》，因為「百鳴歌」主題係樂觀開心，所以喺歌曲後半段加入鼓和小提琴，令歌曲變得有活力和希望。唔少網民都表示聽完有種被超渡嘅感覺，仲讚佢唱得好，紛紛留言：「勇敢的翻唱版」、「繼記憶棉後黃生又一首好歌cover」、「百鳴哥真係帶我哋來回地獄又折返人間」、「我被你人生的歷練超渡了」、「笑到我！ 百嗚哥將破地獄推到另一個境界」、「聽完最後嗰個「生」字，我都被超渡喇」、「超渡完，已經唔記得原唱係點」、「聽到我猶如往生嘅感覺，好正」、「呢次老實講，首歌同呢種唱腔都ok夾到，效果其實都唔錯」、「其實呢首幾啱佢唱，冇之前記憶綿咁震撼」等等。又有網民留言點唱歌曲《黑玻璃》和《緊急聯絡人》，至於《普渡眾生》原唱林家謙亦有分享黃百鳴嘅影片，寫道：「普渡眾生 the first live 超越 (渡) 原唱系列」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！