MIRROR姜濤Anson Lo盧瀚霆fans霸位又起爭執搞到報警 多人被帶走

尋日MIRROR成員姜濤、Anson Lo盧瀚霆同Edan呂爵安出席活動，當然有唔少fans到場支持，但就因為霸位發生衝突，搞到要報警求助。

有專門報導MIRROR fans圈八卦是非嘅IG Page指，尋日活動主辦單位已經喺場地劃分3個專屬粉絲區，但據知有穿黑衣嘅fans喺工作人員開放專屬粉絲區時，衝入姜糖區霸佔頭兩行。該IG Page嘅帖文指呢批黑衣fans入面著住Anson Lo自創品牌ALLOVER服飾，工作人員見狀於是報警。

有fans拍攝警察到場後嘅情況，有便衣警員著現場一批fans拎身份證出嚟。其時有位黑衫女子企起身，阿sir就指住黑衣女命令對方出示身份證。黑衣女疑似同警員講身份證喺架車度，阿Sir就話「冇帶身份證？依家拉你！公眾地方冇帶身份證……我理得你（身份證）有冇喺架車呀？你架車喺天水圍？」，然後阿sir指住其中一人話「出嚟！呢個拉！」。據現場消息，被警方帶走嘅大約有十幾人。

事件發生後，有疑似Anson Lo國際歌迷會以官方account喺通訊群組發文嘅截圖，指有十幾位神徒不遵守大會規定，「對保安工作人員員表現出不合作的態度，甚至與其他在場人士發生爭執，最後更驚動警方。這不僅為在場其他粉絲帶來不便，更嚴重影響大眾對教主及神徒的印象」。帖文呼籲其他神徒遵守規則、尊重工作人員及保持良好態度。

Anson Lo喺活動後發文，向fans表示唔希望大家因為佢而嗌交同唔開心。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！