回顧2024．運動員專訪｜奧運柔道港將受訪爆紅 王嘉莉賽後療傷：失敗會令你更強｜Yahoo
【Yahoo 新聞報道】今年巴黎奧運，港人為逾20位港隊健兒隔岸打氣。奪金固然獲萬人歡呼，更多鎩羽而歸的運動員回歸平淡，在傷患中迎難而上，包括首次出戰奧運的26歲柔道女將王嘉莉。她接受《Yahoo新聞》專訪時，重提在巴黎臨時大皇宮被對手壓倒在地時的一刻，「係我自己問題，有啲鬆懈咗」。賽後她因肩膀甩骹問題施手術，目前正好好療傷，讓身體和心態重整旗鼓，屢敗屢戰，「每次失敗都係一次經驗，會令你更加強」。
王嘉莉首個奧運之旅，在一個「爆紅」的賽後訪問落幕。在32強止步後，她接受《ViuTV》記者饒家輝訪問，期間被問及「做漏咗啲咩」、「唔滿意喺邊度」，嘉莉帶著倦容回應，事後饒遭網民炮轟態度猶如審犯。「其實我係無感覺！我都係就咁答，淨係覺得好攰，想快啲唞」，重提訪問，她笑言並不覺得冒犯，「佢（饒家輝）前一日都有訪問我，有嚟睇我哋賽前練習，所以其實覺得無乜嘢」。
「運動員就係唔想輸」
今年亦是繼2012年後，首度再有柔道港將出戰奧運。奧運從來都不是王嘉莉的目標，反而是亞運，「（奧運）好似好遙遠，對我嚟講好唔實際，諗住慢慢先」。為出戰2023年初的杭州亞運，嘉莉於一、兩年前已開始積極備戰，最終在亞運與日本勁敵對壘，被對方快速技術性撃倒；來到今年4月香港主辦的亞錦賽，亦不敵19歲土庫曼的卻巴露娃（Kurbanay Kurbanova），她賽後哭成淚人。經過兩次失敗，她才發現壓力是自己最大的敵人。
「我嘅風格係比較謹慎、有啲慢熱，次次比賽頭一分鐘，我都好想試探吓對手，就會出少咗招、進攻少咗，一開始好易畀人拎咗分先。亞錦賽嘅對手，之前對過兩次係贏咗佢，因為贏過更加唔想輸，搞到好似好驚，成個人硬晒，乜都做唔到」。
「可能運動員就係唔想輸囉」。
帶著這顆爭勝心，今年巴黎奧運嘉莉希望可一反常態，主動出擊。為此，港隊柔道教頭Ganbaatar Odbayar一改全隊訓練方式，要求他們二人一隊，輪流進攻和防守，訓練進攻的敏捷度。「柔道係好近距離嘅比賽，首先要唔好怯，你一怯就好似停咗咁，一停就有破綻畀對手，要好放膽去做每一招先會做到」。
「以前我好鍾意睇timing（時機），要啱先做，其實有陣時未必，雖然個timing唔啱，但你都可以嘗試」。
一刻分神被反壓 2分鐘完賽
賽前兩日抽籤，世界排名第57的王嘉莉首圈與奧地利代表坦莎（Katharina Tanzer）對壘。雖然對方排名比自己高17位，但兩人曾於柔道訓練營交手，實力不相佰仲，嘉莉堅信「有得打」，「我哋有立『立技』同『寢技』，佢擅長打地下、即係『寢技』，我就諗住『立技』會贏佢，就唔使落去（地）打」。
比賽初段，兩人勢均力敵，嘉莉邊搶衫邊嘗試勾腳不果，期間坦莎以「巴投」技（將對手180度摔於身後）進攻，嘉莉防守成功。兩人一度在地上僵持，「如果無人壓到對方，裁判會嗌暫停，由『立技』再開始過。嗰時我feel（感覺）到佢（坦莎）係無郁嘅，我就望咗一下裁判，以為會嗌暫停，突然間坦莎又郁返，如果有一方繼續進攻就唔會暫停」，最終對方把握機會將她壓倒在地，取得「一本」勝晉級，「當時好想掙扎，但掙扎唔到」。她的首個奧運賽，在2分鐘左右結束。
「係我自己嘅問題」，她多次如此概括是次比賽，「嗰時我都鬆懈咗，有一下係跪咗喺度，如果我想起身，都可以拖到幾秒，但自己覺得望到個裁判就會嗌暫停，其實係唔會，呢個係一個教訓」。當刻自責嗎？「少少，會覺得，唉，點解會咁樣輸㗎？」
曾放棄柔道：又痛又攰
王嘉莉曾經討厭柔道。小學時期，學校要求每位同學都要報讀校內興趣班，還為每樣運動準備了表演賽，讓他們尋找有興趣的項目。在柔道表演時，她看到場上的選手把對方撻來撻去，腳步輕盈且精準，覺得很「有型」，於是向爸媽嚷著要學柔道。
然而，這股熱誠只維持了一年。「打柔道一開始唔係即刻學撻人，要學好多保護自己嘅護身法先」。說罷她向記者示範「拍蓆」，是柔道基本的入門技，當被人撻在地上時，以手卸開力度、頭部仰高，「如果（頭部）撞落地會好嚴重，所以一開始就係咁拍蓆拍蓆，又痛又攰又無力，所以我話『我唔學喇！』」停學一年，爸媽見她好動如常，她半推半就地再被送回柔道班，「其實我係唔想返入去！」她笑道，「不過佢哋（父母）可能係想我識得保護自己」。這是她第一次回歸柔道。
一周六日訓練 過磅日滴水不沾
嘉莉受訓期間有無數個瀕臨放棄的時刻，而她每每選擇留下來：中一加入港隊，一周五晚都要練習，有時難以平衡學業與訓練，「有時要考試就會停一停，但個人唔郁唔舒服，完咗（考試）就會想即刻返嚟打下」；兩年前成為全職運動員，一周訓練六天，兩天健身、兩天跑樓梯，其餘是訓練打柔道技巧，「柔道要靠全身，無話集中訓練邊度，可能有人隻手強啲、core（核心肌群）強啲，呢個係柔道其中一樣幾刺激嘅嘢，因為每一次都會遇到唔同嘅對手」。跑步是最痛苦的訓練，「細個通常一聽到教練話要跑步，我就會話自己病咗！」
體重控制更要咬緊牙關。王嘉莉參與的是女子48公斤以下級別，每次賽前一個月都要開始節食，多吃肉、飯盡量不碰。賽前數日要減至一日兩餐，只能吃雞胸。比賽前夕的過磅日，更要滴水不沾，「食少咗但你訓練量無少到，個人就無咁精神，嗰陣時係最難捱，就會諗『唉，咁辛苦不如唔好練喇！』，但每次捱過咗又好似，咦，都幾好」。
柔道港隊「姊弟檔」 胞弟成最佳隊友
嘉莉來回地獄又折返，全靠一眾隊友，「柔道雖然係個人項目，但我覺得一個人係練唔到柔道，一定要有隊友同你一齊練，你先會有進步」。隊友當中包括她的弟弟王嘉祺，同樣緊隨胞姊步伐，從小就被帶到柔道場旁觀看她練習，「去到佢6歲左右就落場，一齊試下好基本嘅前滾動作先」。
如今「姊弟檔」也是柔道港隊，成為全職運動員，近年會一同到外地比賽，她形容弟弟是很好的陪伴，互相鼓勵，「佢打嗰陣，我又會幫佢加油；我打嗰陣，佢又會喺場上提點吓我要啲乜嘢，互相扶持」。弟弟的打氣聲，是她在賽場上尤其入心的聲音，讓她能回過神來，「因為我集中嘅時候，好難聽到場外面嘅人講啲乜嘢，但細佬把聲係特別易聽到，每一次都會聽到佢把聲」。
「王嘉莉，加油！」
不過，在奧運場上，嘉莉聽到的卻非弟弟的聲音，而是有人聲嘶力竭地喊「王嘉莉，加油！」，「平時連香港啲主場，我都唔係好聽到啲觀眾打氣，但呢次個場咁大我都聽到，就好想贏嗰場比賽」。
奧運回港後，嘉莉需在兩邊肩膊位置施手術。柔道選手甩骹成日常事，「因為一直都甩開，做手術係因為我磨爛咗嚿骨，要補翻中間嚿膠」，她出戰奧運時，兩膊需加上運動貼紮，穩定肩鎖關節。「第一次（甩骹）最痛，之後習慣便好了」，這同樣是她面對輸贏的態度。以往她曾說這次奧運抱憾而歸，但時至今天，痛楚慢慢退去，反之著眼自己的進步，「今次係我最無壓力、最清晰嘅狀態去打，始終都參加過，enjoy（享受）嘅！」這一年，她改變了心態，能夠無壓力去比賽，總算達到了目標。
未來的目標，嘉莉一如以往「佛系」，專注走好眼前每一步，好好養傷。她提起奧運另一場賽事：東京奧運金牌得主、4屆世錦賽冠軍的日本選手阿部詩，在柔道女子52公斤級遇上烏茲別克代表姬迪約露娃（Diyora Keldiyorova），最終竟然爆冷出局，所有旁述、觀眾目瞪口呆，包括嘉莉，「我記得全場係『吓？』，佢本身已經贏緊，但個對手就搏盡」。
「其實我哋都可以做到，對住比自己強嘅對手唔會係輸梗，只要你搏盡其實都會贏」。
「以前一輸比賽就『唉，唔打喇！』，但我都未證明到自己！同埋輸咗畀嗰個對手，我都好想贏返佢一次！」就如當年的自己一樣，學習跌倒、拍蓆、卸開傷痛、站起來再戰，「唔好因為一次失敗就放棄，唔再繼續練習，每一次失敗都係一次經歷、經驗嚟，只會令你變得更加強」。
相關報道：
回顧2024．運動員專訪｜「刁兄」奧運一跑成名 刁俊稀：依家跑唔贏，無話之後跑唔贏｜Yahoo
回顧 2024・總覽：見證我城 366 日內的起跌和變遷｜Yahoo
回顧 2024．人物｜不明液體潑臀部 受害人開專頁籲關注街頭性暴力：人人都是守護網｜Yahoo
回顧2024・市道篇｜23內地連鎖品牌攻港 將軍澳變「小深圳」 內銷貨低價搶客｜Yahoo
回顧2024・市道篇｜內地品牌搶高租金人工 本地小店雪上加霜：香港仲可以捱幾耐？｜Yahoo
回顧2024・逝者篇｜柳俊江、河國榮、抗癌勇士楊嘉驃 泛起漣漪的生命 你記得他們嗎？｜Yahoo
回顧2024・逝者篇｜《龍珠》之父鳥山明、攝影泰斗陳橋、「鐵板神算」董慕節 今年逝去的大師們｜Yahoo
