夾公仔舖翻生｜貴公仔吸客以小博大 台主混戰互相夾貨 玩家變台主始知「有啲係呃人」｜Yahoo
【Yahoo 新聞報道】午夜過後，葵涌廣場的夾公仔機繼續熱鬧，有些是尋找「獵物」的玩家，有些則是場內台主。除了補貨執貨，台主要攪盡腦汁研究機台設定、觀察客人喜好，甚至巡視其他機台，施展高超技巧夾走其他台主的公仔，收為己用。《Yahoo 新聞》訪問了葵涌廣場四位年輕台主，他們不約而同因愛上夾公仔而成為台主。
富仔半年前租下葵廣二樓一部「迷你機」，位置人流普通，但他自有一套策略。「上層右邊放比較罕見（款式）嘅 Chiikawa，左邊都係 Chiikawa，但平民啲，放得滿啲。」迷你機有四格，富仔在下層兩格放更平價的公仔，每格設置的難度與公仔價錢成正比，越便宜的公仔越易夾出。最難夾的當然是市價 1000 至 3000 元的絕版公仔，5 元夾一次，捉緊客人以小博大的心理：「有啲人鍾意向難度挑戰，佢唱咗 100 元散紙，橫掂都係夾，不如試下夾貴嗰啲。如果你問我有無『輸貨』，有嘅。但有無賺呢？都有，因為有啲客人真係唔識夾。」
「玩其他台就知道原來有啲係呃人」
富仔會將客人成功「出貨」的片段上載到專頁 Soulsclaw，說明高難度設定不等於騙局：「決定做台主之後，學啲機點樣操作，玩其他台就知道原來有啲係呃人，會延遲收爪、收窄洞口、擋天車（以外物阻礙機械爪移動）… 咁樣做生意都無意思啦。我都想人哋過嚟玩得開心啲。」
自問算良心台主，但試過有客人花 15 元將公仔夾到洞口後，拍玻璃兼搖晃機台試圖震跌公仔，附近玩家見狀即上前阻止。富仔強調，夾公仔三分技術七分運氣，玩家應依個人技術決定玩哪些夾公仔機，亦可以上網學習「二收」和「推拍」等技巧──即在適當時機再次按掣使夾爪大力合上，以及搖動夾爪而且刻意不夾實目標──累積經驗後才向高難度挑戰：「大機最容易學得好，迷你機個爪細，你未必觸摸到嗰個落點。」
00 後台主 Crystal 以前也很抗拒夾公仔：「我覺得好嘥錢。不過我住得好近葵廣，成日去食嘢路過見到有啲公仔好易出，玩一下又玩一下，玩咗半年已經開始上癮。」夾公仔多終遇虎，她開始發現有些機特別難夾：「開始玩到嬲啦，點解要畀啲咁黑心嘅人賺錢？我自己整部機出嚟大家玩得開心，自己又可以玩。」
現實是「佛心」台主不易做，Crystal 最初放 Sanrio 公仔，將難度調到最低，有客人用 50 元成功夾走三隻：「原來對方都係葵廣某個場主，佢哋嚟『入貨』，打我哋啲公仔。」營業第一個月，她發現全部玩家都是同場台主，每每只花成本三份之一的價錢就將公仔夾走。Crystal 惟有將難度調高，轉換公仔款式，又改租較貴的上層吸引街客，並設定「保夾」，即投夠指定金額後便可夾到成功為止，但問題依舊。「整得容易，避免唔到其他場主嚟夾，好似係邊個夾公仔叻啲就可以繼續喺度生存。但係整得難，街客又夾唔到出嚟，我唔想好似出面嗰啲機咁黑心。」她用盡心思時間研究如何取得平衡，每日改機改到三更半夜，最終營運三四個月後決定退租：「臨近完約我哋上網宣傳吓，又突然吸引好多街客嚟玩，都唔知好唔好繼續做。」
富仔認為台主無法避免高手幫襯：「你無辦法㗎，預咗有機會畀人過嚟打走啲貨，無得話淨係做街客，一定有贏有輸。」因此他才經營社交媒體專頁宣傳，令更多人認識自己的風格，亦作為與客人溝通的平台，有利增加回頭客。他最近更「擴張業務」，在旺角西洋菜南街租第二部機：「因為葵廣都開始飽和，旺角嗰邊無咁多夾公仔機，叫做多一個機會。」
00 後情侶月花 6000 元夾公仔
00 後情侶 Tiffany 與 Edward 是富仔的熟客之一，最近一個月更花了逾 6000 元夾公仔，所以決定將這筆開支改為投資夾公仔機：「我不如用六千幾蚊入貨，試吓可唔可以搵到錢？不過主要都係覺得做台主好似好好玩咁。」他們近日正跟富仔學習如何設定機台，並已經購入市值 500 至 1000 元的公仔增加吸引力：「我哋話租咗之後就唔喺出面夾，有癮嗰陣就喺自己部機夾到無癮先。」在市場接近飽和時才進場，夾公仔潮流還能延續多久？二人笑言：「我哋都想知。」經場主遊說之後，原本已經退出的 Crystal 亦已經在 12 月重返葵涌廣場，再次做台主：「有時睇返錄影，有啲人夾到公仔係會好開心，超級開心！我哋見到都會好開心，有時仲收到客人訊息話玩得好開心，呢一點係我堅持做落去嘅原因。」
