被傳與母甄珍失蹤 劉子千唱《唸你》係老豆劉家昌靠害？改名章立衡求切割

被傳同媽媽甄珍失蹤嘅劉子千（現名章立衡），因為一首《唸你》而「唱紅」兩岸三地，但係曲風老土兼被恥笑「鴨嗓」，加上歌曲係由父親劉家昌創作，令劉千子被指「成功需父幹」。

背負負評多年，甄珍2017年出post踢爆《唸你》背後故事，外界明白劉子千或多或少係被老豆「靠害」。

2009年，23歲嘅劉子千簽約華納，推出首張專輯Mr.Why，曲風具有美式流行元素，成績不錯。但係2年後劉子千轉唱片公司，兼且推出風格「截然不同」嘅《唸你》，加上MV「古早味」濃厚，唔少人跌眼鏡之餘都大鬧老土。劉子千當時回應傳媒話首歌係為爸爸而唱，爸爸高興就好；而劉家昌就將「鴨嗓」歸咎係幕後人員出錯。後來劉子千出多一張專輯就冇再做音樂，改以演戲為主。

2015年，有傳媒爆料甄珍同劉家昌原來已經離婚30年，而劉子千就主要同媽媽生活。2年後，劉家昌喺facebook爆seed，暗示甄珍同劉子千兩母子「無知無恥」，又惡言批評劉子千係「畜牲」，言詞極其尖酸刻薄。

甄珍不忿兒子被攻擊，之後發千字文大踢爆，佢同劉家昌喺劉子千一歲時離婚，原因係有人豪賭成性。之後劉家昌好少理屋企，兩母子相依為命，後來子千獲得華納賞識簽約出唱片，但劉家昌突然要求華納同劉子千解約，仲要脅製造負面消息，唱片公司為免麻煩只好答應。後來劉家昌要劉子千唱《唸你》，劉子千為免甄珍難做，只好硬食。

甄珍仲爆，劉子千唔願意再被爸爸主導音樂風格，劉家昌就威脅會「對外說你在家打爹罵娘」，務求斷佢米路。而據甄珍所講，劉家昌多年來都有問佢攞錢，甚至拎完錢先再去香港申請離婚。至於令劉家昌鬧爆個仔嘅導火線，係劉喺網上節目怪子千唔理佢，完全不符事實，甄珍唯有出信以節目未經授權播放劉子千歌曲為由，要求移除內容，就咁焫著劉家昌。甄珍坦言，劉家昌斷晒劉子千所有音樂路，令劉子千見到結他都反感。

2018年，多次控告甄珍嘅劉家昌，忽然同劉子千開記者會宣布冰釋前嫌，劉亦聲稱放棄提告。但後來劉家昌又話甄珍講大話，於是反口再作控告。2019年，劉子千喺社交平台宣布改名章立衡，改跟原名章家珍嘅媽媽姓氏，明顯想同老豆切斷連結。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！