鄭秀文許志安淺水灣被野生捕獲 低調情侶襯色小物足證默契？

早排政府建議的士加裝攝錄鏡頭，令唔少網民提起「安心事件」。事發5年多後，男主角許志安已經重新出發，陸續喺外地舉行音樂會；而今年中鄭秀文舉行紅館個唱時，安仔亦為Sammi再踏紅館台上與太太合唱，相信二人感情早已雨過天青。

有內地網民早前喺淺水灣影灣園，遇著鄭秀文許志安兩夫婦，大好機會當然要求二人合照。從片段所見，Sammi繼續以時尚打扮示人，穿上皮褸牛仔褲襯短靴，架上大大副墨鏡，盡見天后氣場。反觀許志安就著得好平實，運動褲搭運動鞋配cap帽，一副休班明星造型。

眼利嘅網民就睇到Sammi手機殼同安仔嘅口罩都係橙色，話佢地低調地展示默契；有fans甚至記得，安仔之前post嘅生活照，由跑步機屏幕反映見到安仔都係用橙色手機殼！

鄭秀文許志安不時分享家居生活照，有睇Sammi IG都認得佢屋企幅紅磚牆同埋個廚房，正正就係佢喺淺水灣海峰園嘅屋企，市價估計7千萬左右。鄭秀文手上至少有3間物業喺淺水灣，其中喺南灣花園嘅單位堪稱Sammi風水屋，因為佢早喺出道2年後，即係1990年以323萬買入，而家市值至少3千萬。而Sammi老公許志安亦喺淺水灣道冠園有單位在手，位置喺海峰園隔離，早年有傳安仔將呢間屋俾外父外母居住﹐方便Sammi照顧家人。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！