被床哥暗串遊台 Edan冀互相尊重「無謂兩邊拗」 姜濤出手留言反擊「唔係一句講笑就無事」

ViuTV今日（27日）舉辦《CHILL เก่ง Music Festival》記者會，宣佈將於12月20日在啟德體藝館(Kai Tak Arena) 舉辦匯聚香港與泰國兩地歌手的音樂會，同時亦為啟德體育園測試活動其中之一。會後Mirror成員呂爵安（Edan）及姜濤回應近日JFFT成員床哥在直播影片中暗串Edan的風波，兩人指不想引起一啲不必要嘅紛爭，好尊重每一個音樂單位，又指身為公眾人物一言一行均需深思熟慮。

床哥早前在直播環節中，稱叱吒投票時段將與粉絲同行，「唔會去台灣」、「我哋有晒女朋友有家室」、「會落區一齊拉票」等暗串早前承認與林明禎遊台的Edan。其後姜濤亦在網上帖文留言「無品」直指床哥不是，Edan指「佢呢個舉動係出於想保護我，好多謝姜濤」。他指本身亦有留意JFFT，認為他們甚具特色及風格，「床哥我間唔中都會睇佢一啲片段……印象中我覺得佢好聰明同好有諗法嘅人」，故Edan認為床哥直播時的言論並無惡意，「唔係想傷害（他人）或者特登要咁做，可能都係想開下玩笑，咁當然開玩笑可能會無意中影響到其他人」。

他又指床哥言論「或者可能過咗火都可以理解」，最重要是互相尊重，不引起不必要的紛爭，「大家都係成年人成熟嘅」。Edan指昨晚亦收到YT的短訊，「就話如果影響到你嘅話唔好意思，佢（YT）都話會同佢（床哥）了解下」。他強調「我呢邊就覺得總之大家就互相尊重，唔希望件事去咗一個對立嘅層面，其實大家都係做呢行，都係想帶歡樂畀大家，無謂兩邊喺度拗」。

Edan又特別感謝其粉絲「爵屎」，指「工作永遠都係我第一位，我唔會畀任何嘢影響到我嘅工作，做任何工作都係100%付出去做」，又指「可能爵屎呢段時間都會覺得辛苦，知道有好多唔同嘅聲音，甚至有好多不解，知道佢哋都辛苦，我知道佢哋好錫我，為我付出好多，我都好感動，所以我嚟緊都會用作品去報答佢哋」。

至於代Edan出頭的姜濤就指，他尊重每一個音樂單位及每一個音樂作品，「個留言絕對只係就嗰件事去講」。他指在心中認為臨近年尾每個音樂單位、每個音樂人均會為獎項拉票，他亦尊重不同人用不同方法拉票，「但尋日睇到嗰個直播（片段）之後覺得係咪要用呢個方法去爭取票數呢？我覺得呢件事係值得討論嘅」

他指身為公眾人物，「一言一行其實都好有份量……某程度上大家都係同行，將心比己多啲，因為我哋每個人講每句說話，都有自己追隨者去仿倣，所以我哋講嘅每一句說話都要思考過」。姜續指「我覺得唔係一句講笑就可以無事，因為你可以講笑，但喺某啲人心目中會畀你無意中嘅玩笑傷害咗都唔一定」，「如果我唔回應，我唔知下次會唔會有第二啲嘢會用咁嘅方式去做……喺我心目中就唔認同（此做法）」。