《開心速遞》演員價目表引熱議TVB出信闢謠 鄧兆尊爆圈中秘密吳家樂分析可信度

網上近日瘋傳一張TVB處境劇《愛．回家之開心速遞》的演員價目表，引來大批網民注意及熱議，TVB日前發聲明回應事件。鄧兆尊、吳家樂、謝遜亦於其主持的網上節目《娛樂好好玩》中討論，分析價目表的可信度，又大爆圈中秘密。

《娛樂好好玩》談及《愛．回家之開心速遞》的演員價目表，吳家樂和鄧兆尊不約而同地認為網上的演員價目表可信性很低，吳家樂指出：「騷錢貴與唔貴有時係累積出嚟。丹爺做咗咁多年，如果由當年嘅Sit-com，即叉燒炳到𠵱家，佢每年加少少、加少少，咁佢嘅騷錢點會少？呢度$6000係畀少咗佢。我估㗎咋。正常嚟講，年資愈長，騷錢都會愈高，當然知名度啦，但呢個就不能作準。」鄧兆尊說：「男三，係咪即係安仔啊？一定冇咁高啦。我肯定。」謝遜：「會唔會睇返人氣？嗰排人氣好紅。」鄧兆尊回答他：「唔關事，因為佢早簽約，定咗個價錢，唔會話紅咗就突然間加價，冇呢樣嘢。」吳家樂謂：「同埋都係好海鮮，睇市場，嗰時搶人嘅話，自然畀你嘅薪酬會高啲，你壓價嘅能力都大啲。但市道低嘅話，大家共度時艱一人減啲，都要減。好睇你喺邊一段時間入職。」

娛樂圈的演員薪酬令不少網民好奇，鄧兆尊表示：「我同家樂傾過偈，佢都減過人工。」吳家樂承認：「係啊，包薪都要減。所以睇吓你當時個位置係咩。當時冇咁多計算方向，好簡單就係一個騷、兩個騷，唔會話咩0.2啊。」鄧兆尊問：「有0.2嗎？」吳家樂回答：「梗係有啦。」鄧兆尊指：「嗰時有半個嘅，不過都當一個計，冇咁誇張。」吳家樂認為：「當時一個Sit-com冇咁多人，你真係一個禮拜出足五日。」鄧兆尊否認：「我唔係，我8成左右。3、4集。」吳家樂恍然大悟：「其他嗰啲去晒家燕姐度。」鄧兆尊解釋：「因為係佢屋企丫嘛。我係入贅，我都唔係主家庭，我係次要家庭。」

謝遜提問：「會唔會知道大家嘅薪酬？」鄧兆尊爆料：「拿！女人嗰時我哋唔知。男人有時傾開偈大家都知，大約個Range都知嘅。有個說話就係，大家都係嗰個年份去傾約，謝天華就好笑，佢話佢唔信呀，佢上去要求加$50， 嗰時一包煙$50，如果一包煙都加唔到，佢唔撈。跟住上完去傾完返嚟，佢話冇得加。咁你係咪唔撈啊？佢話冇喎咪繼續撈囉。我記得有年係全部都冇得加。嗰時《皆大歡喜》好紅㗎嘛，冇理由$50都加唔到。你諗吓咁紅啊，我哋要求每個月加$50咋，都加唔到。不過始終公司係畀咗機會大家嘅。」

眾人再度談論網上流傳的演員價目表，鄧兆尊覺得：「基本上入面嘅冧把，我同家樂都覺得係唔係正確嘅數字。」吳家樂指：「你淨係豪仔啊，佢點會$500一個騷啊。」鄧兆尊認同道：「梗係唔會$500，做騷都$2500啦我估。」吳家樂說：「佢做咗咁多年，點會得$500。阿廉點止$2000個騷啊。」小紅書一位臨時女演員表示一天薪酬有$380，鄧兆尊隨即說：「加咗價喎。」吳家樂謂：「係啊。好好喎。佢計埋抽佣之後$380喎。」鄧兆尊憶述：「我做嗰時係$140至$160，包一個飯盒。做個死屍嗰啲。」吳家樂表示：「我聽過有啲食水深啲，臨時演員實收得$100。」鄧兆尊認為：「睇吓臨時演員間公司點樣計。」