李佳芯Ali離巢認有接觸其他公司傾合作 有留意MIRROR等小鮮肉揚言可演姊弟戀：好驚被人笠麻包袋
親證已離開TVB的李佳芯（Ali）今天（16日）首次以自由身身份出席活動，並成為多間傳媒的採訪焦點，不過舊東家TVB則未有派人前來採訪。曾效力TVB 12年的Ali分享離巢的感受，她很感激舊公司為她帶來的各種機會和知名度，又表示希望未來會有改變及接受更多新挑戰。對於其他台的小鮮肉如人氣男團MIRROR，Ali表示有留意且有意與其他演員試演姊弟戀，不過笑言怕對方的Fans會介意。
活動中，現場有傳媒恭喜Ali，她表示：「其實我都未有咩好消息公布丫。」被問到是否已完約？她回答：「完咗喇。（舉起咪牌）都好明顯喇係咪？（係咩心情？）其實都冇咩特別。心態上又好似真係冇咩點變，因為一直都覺得演員係咁，要裝備好自己，跟住等一個好嘅機會、好嘅角色，所以心態依然係咁樣，𠵱家幾好丫，睇到你哋好開心，我又好開心。」被問到有否被公司挽留？Ali謂：「有傾過嘅，有拉鋸過一段時間。（拉鋸咗幾耐？）其實都......一年左右啦。」她續說：「係啊，係和平啊。我諗雙方都有唔同嘅考慮因素嘅，但對我嚟講，當然演員梗係會想有更加大嘅挑戰、唔同嘅挑戰、好嘅角色。有時去到唔同階段會想試一啲唔同嘅嘢，會有少少改變同挑戰，呢樣都係我自己打從心底想做嘅嘢，所以呢段時間，喺2024年我都去學咗唔同嘅嘢，讀書啊去增值，對我嚟講都係一個Refresh，呢個好緊要嘅。」她謂：「有讀戲劇嘅課程，有去讀一啲心理學嘅課程、藝術治療嘅課程都有，暫時都係短期Course，唔知有冇機會讀長少少時間，之前始終有合約喺身，喺讀書方面未必咁自由，有時會返嚟做嘢，𠵱家睇吓會唔會Take一啲長時間啲嘅Course。」
被問到會否去英國？Ali指：「我有去咗唔同嘅地方。（例如呢？）有去台灣、英國，𠵱家計劃可能會再去其他地方。」被問到完約的時間，她直言：「12月。真係完咗喇。我舊嘅約真係已經完咗喇。（仲有劇集未播？）應該仲有一套《麻雀樂團》。（會唔會返去宣傳？）如果有需要當然會啦。（會否擔心因完約而變倉底？）我冇諗喇，呢個就公司安排喇。（24年）6月先拍完。所以都幾新嘅一套劇，應該未咁快播掛，我都唔知。有一套存貨。（向電影發展？）其實我又冇局限係咩嘢，唔同嘅機會都會想試，演員都係想挑戰唔同角色。唔同嘅公司都有去傾緊，都有傾合作。（會否唱歌？）我希望每一次出嚟嘅表演，無論係演戲或唱歌，都希望係每一次都有進步，呢個係我一直以嚟嘅目標，包括唱歌都係。大家下次聽咪知，哈哈哈哈！我期待下一次唱畀大家聽。」
提及TVB時，她感慨道：「成個過程啲我嚟講最感動係，喺一個地方留咗12年，點都會有感情。同埋，12年嚟好多回憶，好多好好嘅同事，好多唔捨得嘅人同回憶都喺入面發生過。12年前，可能真係唔係好多人識李佳芯，12年後嘅今日睇返，其實好感謝呢個地方，亦都令我成長咗，亦都令好多人認識我，係一個幾唔捨得同幾感激嘅地方。始終，點都會有完結嘅一日。去到今日，就覺得可能試吓新嘅嘢對我嚟講都係一個適合嘅時候。」被問到會否不捨得某些拍檔？她表示：「呢行好細嘅，我覺得點樣都會遇返對方，就算唔係工作都好，私底下都可能會見到。同唔同嘅人會有唔同嘅火花，我都會期待。（有冇留意其他台嘅小鮮肉？）都好多鮮肉，都有......我話冇留意過就呃你啦，MIRROR係好多人留意，但我好驚㗎啲Fans，會唔會一合作完，演完情侶就被人笠麻包袋。一係就唔諗，一諗就梗係要諗大啲。姊弟戀都好似幾興丫，係咪？（有冇人選？）無所謂。佢高過我就得㗎喇。照計好多人高過我，唔好玩啦。因為基本上冇咩邊個矮過我啦，所以我搵對手好容易。（有冇想簽新公司定抖吓先？）我冇諗啊，我係非常之隨遇而安，總之有好嘅合作、啱嘅合作，對大家嚟講都好就會去做。」
被問到去外地讀書有沒有艷遇？Ali笑言：「你哋咁樣係冇用㗎。但係有識到新朋友，男女都好，都有識到新朋友。我冇呃你啦，去幾個月都一個朋友都識唔到。（有冇心動嘅朋友？）未有，心跳我一直都有嘅，突然去到外國停咗心跳咁樣都幾大獲。（有冇邊啲男同學符合到你心水？）好多Oppa啊。我講真㗎，𠵱家發覺我出去讀書多咗好多韓國人，無論男女都好，女嘅更加多，好多女仔都好有型，Quit咗份工啦，我都搵咗幾年錢喇，梗係要見吓呢個世界。Quit咗份工讀書讀兩年。我心諗我讀幾個月姐，你讀兩年，我以為自己好型啦。No！人哋Quit咗份工讀兩年。」
她有感而發：「每個地方都係，12年喇，甜酸苦辣咩都有㗎喇，唔同嘅感受都有出現過，所以到𠵱家對我嚟講，起碼我諗返轉頭呢12年都係冇白費過。我有努力過，頭先所講大家認識我，反而個感覺係有啲感動同感激。（甜酸苦辣係啲咩？）全部都有。（但你咁重情，佢今日人都唔派嚟採訪）唔係啊，我見到有好多熟悉嘅臉孔。（你望一望有咩咪牌）我唔望喇，有啲嘢唔好睇得咁清楚。（有冇請人食散水餅？）唉啊！其實我想派利是啊，我希望會再見到大家。」她又謂：「唔同階段嘅狀態，或者追求嘅嘢唔同，呢個都係其中嘅一小部份啦。我覺得就算出到去都要捱更抵夜嘅，做每份工都會，特別係做演員。（想拍電影？）希望有機會啦。」
｜李佳芯親證已離巢舊東家未派記者採訪 Ali感激TVB拒望咪牌：有啲嘢唔好睇得咁清楚
