《回到未嫁時》劇情預視2025年香港？周海媚未能成「模範祖母」網民心痛
1990年TVB劇集《回到未嫁時》，由當時得令嘅黎明同周海媚主演。劇集大結局出現一張2025年1月1日嘅報紙，有網民趁呢個日期已到而搵返劇集截圖，對照當日預言有幾多成真。
該份報紙嘅頭條係報導「特區模範祖母冠軍」，劇中同黎明結婚嘅周海媚喺2025年成為嫲嫲，仲拎埋特區模範祖母。可惜嘅係，現實中周海媚於2023年12月逝世，終年57歲，而且未婚未嫁，未有成為祖母，更無法目睹2025年來臨，令人惋惜又心痛。
此外，劇中周海媚丈夫黎明同樣未成為爺爺，Leon 2018年升呢成為爸爸，女兒今年6歲。有網民指劇中報紙仍為黑白印刷，但現實中早已有彩色報紙，不過紙媒地位已大不如前。
《回到未嫁時》可以話係鼻祖級穿越劇，講述黎明同周海媚結為夫婦後，黎明專注工作冷落嬌妻，一次爭吵後周海媚去機鋪打機打爆機，點知時光倒流回到4年前，周海媚更失憶，卻再次遇上黎明。最後周海媚回到現實時空，並且同黎明有個大團圓結局，兒孫滿堂，因此先至出現2025年嘅報紙報導「特區模範祖母」。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
