叱咤2024賽果惹爭議！KOL拍片寸「努力論」 網民：不能同意更多

《2024年度叱咤樂壇流行榜頒獎典禮》喺元旦日晚已經圓滿舉行，作為最矚目及最令樂迷期待嘅樂壇成績表，當然吸引唔少人關注。男團MIRROR再次成為大贏家，除咗冧莊奪得「我最喜愛的組合」之外，陳卓賢（Ian）獨攬4大獎項（「男歌手金獎」、「唱作人金獎」、「至尊唱片大獎」及「至尊唱片監製大獎」）；盧瀚霆（Anson Lo）憑歌曲《Hey Hey OK!》奪得「叱咤十大」第八位；而姜濤則奪「我最喜愛的男歌手」及「我最喜愛的歌曲」。今次嘅賽果繼續有人歡喜有人愁，喺網上引起唔少爭論，當中包括「努力論」，更引起KOL拍片出PO表示唔同意講法。

KOL「嚴重脂肪哥二世」喺IG出PO，留言寫上：「你可以好欣賞佢好佩服佢，但唔應該接受佢喺個市場度」，並喺短片中講話：「可唔可以唔好再用嗰啲『好努力、好努力』嚟形容嗰啲難聽嘅歌手呀？你努力都難聽，咪即係你唔適合喺呢行囉！唔見你同啲醫死人嘅醫生講話佢好努力嘅？我DSE 5條4、好努力呀，俾我做醫生啦！即係其他行業唔會咁㗎喎，你唔會話一個踢波好廢嗰啲人，跟住你話『佢好努力㗎，俾佢繼續踢英超啦！』係唱歌呢行先係咁㗎喎，好難聽唱歌走晒音，『不過佢好努力㗎啦，俾次機會佢啦！』，係呀然後好聽嘅歌畀晒啲好難聽、走晒音嘅歌手唱囉，唱得好嗰啲又冇得唱！」

呢個PO一出，唔少網民紛紛留言表示認同講法，例如「好中肯」、「講中哂我心裡嗰句話，練好啲音準，高音要穩，係要練，唔係講句好努力就過骨」、「我要嘅係實力呀 唔係努力呀」、「認同，近年聽到歌手唱live 好穩，就已經被棒到上天，但其實專業歌手應該係咁，我去迪士尼睇啲show 個個都好穩。 好多人寫到好歌做到好嘅音樂，但忽略咗表演呢一環。」、「不能同意更多」、「呢個評價超公道, 簡直係劣幣驅逐良幣。 小心被人出征」、「好波 好real」、「一針見血」、「多謝你咁中肯！」、「真係！我尋晚都同朋友講同一番說話 努力係基本嚟啦！」及「夠膽講真話！欣賞你！」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！