叱咤2024︳容祖兒《九秒九》得獎 何韻詩留拍掌emoji讚好

2024年度叱咤樂壇流行榜頒獎典禮上，近年主力發展內地嘅容祖兒以《九秒九》獲得叱咤十大，祖兒更罕有回港出席頒獎禮攞獎。早前因失聲而未能喺內地演出上獻唱嘅祖兒，以略為沙啞聲線唱出得獎歌，當中有一兩句失準，因此引起網民討論。

容祖兒多年fans、網紅瓊姐為祖兒得獎出嘅post，居然得到一度同祖兒友好嘅何韻詩以拍掌emoji留言，令唔少網民激動讚好，甚至以歌詞嘅「不理 現已 墮進 誰懷抱／都肯 應你召喚 ／ 你說一句就好 Just Let Me Know」留言。容祖兒同何韻詩曾經孖公仔出席叱咤多年，但現時各有發展，難怪唔少樂迷都對hocc浮上水面撐祖兒嘅留言咁大反應。

祖兒得獎後post出同《九秒九》作曲人Gareth Tong合照，何韻詩同樣有like！

何韻詩都有出story俾唔同得獎歌手，包括多年前阿詩曾簽為旗下音樂人嘅Kiri T，又向姜濤打氣「請好好感謝一下你自己，你的努力和堅持」，並為鄭秀文得獎感到開心，認為Sammi實至名歸。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！