與王星同期到泰國 內地演員范虎險上當 另一演員何俊旻失蹤但被爆疑似講大話

日前內地演員王星獲劇組邀請到泰國參與演出後失蹤，其女友嘉嘉喺網上發起尋人，迅即引起網民討論。終於王星喺尋日（7日）獲確認人身安全，並由當局安排由緬甸返回泰國。

王星脫離險境，但內地另一名演員何俊旻，就被瘋傳同樣喺早前獲「劇組」邀請到泰國參與演出後失蹤。內媒報導指，何俊旻上周去泰國接拍名為《緝毒女警》嘅戲。曾經評論王星失蹤事件嘅內地女星邵逸凡表示，佢同何俊旻透過短訊聯絡，何三日後先回覆，但邵認為何嘅回覆好奇怪，而且冇接聽視像通話，只係接語音電話，話自己身在泰國拍《緝毒女警》。報導提到，聲稱喺泰國嘅何俊旻，向親友發送拍攝現場嘅照片，不過相片中幾個人都係着住羽絨褸，與泰國炎熱天氣有出入。而親友要求何俊旻發通告單等以證明真係拍戲，何都冇回應。

但係邵逸凡之後刪走關於何俊旻嘅微博發文，並聲稱「大家認識的一個演員說自己在泰國拍戲並且說話支支吾吾大家很緊張，我幫擴後沒多久，發現是這個人在用虛擬定位騙大家」。

另一名內地演員范虎接受內媒訪問時亦自稱爭啲同王星一樣被送到園區，但因為有懷疑而冇上到「專車」，後來成功甩身並安全回國。

范虎指上月27日喺一個演員群組見到有招募信息，范後來試演兩段戲並發俾劇組，對方居然一個鐘頭後就回覆話好滿意。范虎本來覺得奇怪，但因為劇組聲稱男主角可能甩底，令范放下戒心。連同范虎在內嘅4個演員以及劇組接頭人開咗個群組，而范虎同另一名自稱同樣被騙嘅徐大久，喺12月28日就飛到曼谷，但接頭人安排2架車接范虎同徐大久，令佢地心生疑惑。

范虎之後收到一同被招募到泰國嘅另外2名演員向佢發訊息，話佢地嘅回程機票被退票，范更加覺得唔對路，范虎嘅經理人叫佢唔好上接頭人安排接送嘅車輛，范虎同徐大久於是自己搵車去接頭人安排嘅酒店。范虎其後發現，接頭人幫4個演員只係訂一間房，並聲稱因為酒店冇房，但范虎查看訂房平台發現酒店有唔少空房，令佢思疑接頭人係咪故意將4個人分開。

范虎後來喺社交平台搵到劇組資料顯示嘅泰國導演，私信對方了解詳情，導演好快就否認拍戲事宜，並著范虎等人小心安全。范虎等四人知道墮入騙局，於是偷偷離開酒店，並且同前台職員講話去玩，而且搬去另一酒店暫避。最終4個人喺12月30日安全返回北京。

報導刊登咗「劇組」提供嘅劇情大綱、角色性格設定等資料，范虎話「劇組」相當熟悉演藝圈運作，片酬亦好接近市價，因此好容易信以為真。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！